Meeqqanut Corona pillugu erinarsuut

Erinarsuut ”Eqitaaqqikutsooqqikkumaarpugut” tuniluunnerup qanoq siaruatsaaliorneqarnissaanik meeqqanut siunnersuuteqarpoq.

Talinnut quersorit. Assannut sprit atoruk. Assatit asakkit. Qanillinaversaarit. Siunnersuutit tusareersimagunarpatit, kisianni Kimmernaq Kjeldsenimit, Frederik Elsnerimit aamma Hinnarimmit meeqqanut erinarsuutituunngitsoq. Ullumi erinarsuut ”Eqitaaqqikutsooqqikkumaarpugut" saqqummersinneqassaaq, erinarsortartunit taakkunannga pingasunit piffissami imaaliallaannarlugu allallugulu Kommuneqarfik Sermersuumut immiussimavaat.

Isumassarsiaq borgmesterip allaffiani aallartippoq, nukarlersatta pisup ilungersunarneranik qanoq paasinnitsinneqarnissaat borgmesteri Charlotte Ludvigsenip isumassarsiarimmagu. Isumassarsiaavoq meeqqanut erinarsuutaanissaa, malittarisassanik malinninnissap qanoq pingaaruteqartigineranik.

”Tamatta pinngitsoqarata virusip inuiaqatigiinni siaruaatinnginnissaa pillugu angisuumik akisussaaffeqarpugut, mannali tikillugu inersimasut kisiisa paasissutissittarpagut, tamannalu ajorluinnarpoq. Erinarsortartutta pikkorissut musikvideo-liaat assorsuaq nuannaarutigivara, siunnersuutit pitsaasut meeqqat naligalugit, nuannersumik paasiuminartumillu saqqummiummatigit," Charlotte Ludvigsen oqarpoq.

Erinarsortartut taakkua pingasut Kimmernaq Kjeldsen, Frederik Elsner aamma Hinnarik suliassinneqarput. Peqatigiillutik erinarsuut Eqitaaqqikutsooqqikkumaarpugut suliarivaat, taannalu ullumi saqqummersinneqassaaq.

"Suliassiissutigineqartoq nuannerpoq. Meeqqanut nipilersuummik suliaqarneq inuunermik uppernarsaaqqittuaannartuuvoq, peqatigitillugulu erinarsuutip takutippaa eqqumiitsuliornerup nalaataqarnermi aamma pingaaruteqarnera. Erinarsuut aamma erinarsuutigalugu iliuuseqarfigineqarsinnaavoq. Assersuutigalugu utertarnera 20 sekundtinik sivisussuseqarpoq, taamaalillunilu erinarsuutigaluni assat innersuussutigineqartutut asanneqarsinnaallutik”, Frederik Elsner oqarpoq.  

Erinarsuut piffissami tassani qanoq iliornissannut tunngavoq: Assatit asakkit, talinnut quersorit aamma qanillinaveersaarit – aamma pinnguaqatigisartakkannut. Meeqqammi piffissami immitsinnut qanillinaveersaarfitsinni sulerissappat? Erinarsuut tusarnaaruk paasillugulu.

Erinarsuummut musikvideo Josef Tarrak-mit suliarineqarpoq, taannalu takusinnaavat uani: